भारतका लागि नेपाली राजदुत फिर्ता बोलाए पछि भारतले नेपाली दुतावासमा भारतीय सेना खटायो
भारत सरकारले कुटनीतिक निकायको सेवा–सुरक्षार्थ गठन गरेको प्रहरी बल (इन्डियन रिजर्भ बटालियन)लाई बाराखम्बास्थित नेपाली दुतावास परिसरमा पनि खटाएको छ । नेपाली दुतावासको अनुरोधमा पारस्परिक–सुविधा (रेसिप्रोकल)को प्रावधानमा गृह मन्त्रालयले तत्कालका लागि १० सशस्त्र प्रहरीको बटालियन खटाइदिएको छ । काठमाडौंको लैनचौरस्थित भारतीय दुतावासमा पनि नेपाल प्रहरीका झण्डै डेढ दर्जन सुरक्षाकर्मी कुटनीतिक सेवा/सुरक्षामा खटिँदै आएका छन् ।
‘कुटनीतिक सेवा/सहुलियतको रेसिप्रोकल प्रावधानअनुसार हामीले कुटनीतिक निकायको सुरक्षाका निम्ति आग्रह गरेका थियौं,’ दुतावासमा सुरक्षा मामला हेर्ने काउन्सलर एसएसपी यादवराज खनालले बताए । भारतमा रहेका अन्य कुटनीतिक निकाय/कार्यालयमा समेत सुरक्षा सेवाका लागि इन्डियन रिजर्भ बटालियनको प्रहरी टोली खटाइएको छ ।
बटालियनको सिक्किम प्रहरीअन्तर्गतको नेपालीभाषी प्रहरी टोलीलाई नेपाली दुतावासमा खटाइएको छ । टोलीले दुतावास कार्यालय र आवासीय कुटनीतिक क्षेत्रको सुरक्षा निगरानी गर्नेछ । बिशेषत जन्तरमन्तर क्षेत्रमा आयोजना भइरहने धर्ना/हड्तालमा जाने क्रममा बाराखम्बा रोड हुँदै जुलुस आवतजावत गर्दा नेपाली दुतावास परिसरमा असुरक्षा बढेकोबारे गुनासो बढेपछि गृह मन्त्रालयले यसै साताबाट कुटनीतिक नियोग सुरक्षार्थ रिजर्भ बटालियन खटाएको एक अधिकारीले बताए ।
यसअघि दुतावासले खटाएका स्थानीय कर्मचारीले दुतावास सुरक्षाको जिम्मेवारी पाएका थिए । तर, स्थानीय दरबन्दीमा २० भन्दाबढी कर्मचारी राख्न नमिल्ने भनेर नेपाल सरकारले परिपत्र जारी गरेपछि सुरक्षामा खटिएका कर्मचारीसहितलाई अवकाश दिने निर्णय बाहिर आइसकेको छ । दुतावासले अवकाश दिइने भनेर छनौट गरेका स्थानीय दरबन्दीका नेपाली तथा भारतीय कर्मचारीसँग ‘स्थायी सेवा’को आधिकारिक कागजात रहेकाले कर्मचारी हटाउने निर्णय कार्यान्वयनमा आइसकेको छैन ।
0 comments
Write Down Your Responses