प्रचण्ड र ओलीका कार्यकर्ताहरु लाई 'नयाँ शक्ति' का करिश्माले दिए यस्तो कडा प्रतिक्रिया
काठमाडौं, ८ असार । सदावहार नायिका तथा नयाँ शक्तिकी नेतृ करिष्मा मानन्धरले आफ्नो आलोचकहरुलाई मनछुन जवाफ दिएकी छन् ।
बुधबार बिहान सामाजिक सञ्जाल फेसबुकमा स्ट्याटस लेख्दै उनले विद्वता छाँट्ने विद्वानहरु राजनीतिमा नआएकोले आफू राजनीतिमा आएको बताएकी छन् ।
‘म भन्न चाहन्छु, तपाईहरु जस्तो ज्ञान भएका विद्वानहरु राजनीतिमा आइदिनु भएको भए यो देश उहिल्यै बनिसक्थ्यो,’ उनले अगाडि लेखेकी छन्, ‘र करिष्मा मानन्धर जस्तो अल्पज्ञानीहरुले देश बनाउँछु भनेर अघि सर्नुपर्दैन थियो । यो मेरो लागि सौभाग्य भए पनि यो देशको लागि दुर्भाग्य हो ।’
उनले आलोचकहरुलाई भनेकी छन्, ‘मसँग तपाईहरुसँग भएको डिग्री त छैन होला तर तपाईहरुँसग म सित भएको देशको फिक्री छैन…’
यस्तो छ उनको स्ट्याटस
केही लेख्न मन लाग्यो
यहाँ धेरै विद्वानहरु छन् । तर ती वर्गहरु त्यतिबेला सक्रिय हुन्छन् जब यहाँ कसैले गल्ती गर्छ या उनीहरुले कसैको कमजोरी पत्ता लगाउँछन् । नयाँ शक्ति नेपालको घोषणासभा पनि सबैको चासोको विषय बनिरह्यो । त्यस समारोहमा मबाट केही गल्तीकमजोरीहरु भए । अनि ममा अरु पनि धेरै कमजोरीहरु होलान् र छन् । मैले नजानेका अझै थुप्रै कुराहर होलान् …
अनि
न राजनीति मेरो पृष्ठभूमि हो
न राजनीति मेरो चासोको बिषय रह्यो
न राजनीतिमा सक्रियरुपमा आवद्ध भएर अगाडि बढ्ने कुनै दिन कल्पना गरेको थिएँ
र, आज पनि मेरो जीवन रहेसम्म एउटा कलाकारकै रुपमा सजिएर रेड कार्पेटमा टक टक टक टक हिंड्न चाहन्थेँ होला र बिहानको चियाको चुस्कीसँगै अनलाइन र पत्रपत्रिकामा आफ्ना फोटोहरु हेर्न चाहन्थेँ होला । त्यही मैले जानेको र चाहेको चिज थियो ।
मलाई कसले राजनीतिमा ल्यायो ?
म किन राजनीतिमा आएँ ?
ती मानिसहरु जसको जिम्मामा राजनीति नै थियो, उनीहरुले के गरे ?
अनि अर्को एउटा समूह जो विद्वान छन्, ती विद्वानहरु जो लामा लामा लेख लेखेर आफ्ना विज्ञता दर्शाउँछन् र यहाँका हरेक क्षेत्रका कुना कुनाका हिसाब किताब राखेर बसेका छन्, उनीहरुलाई देश कसरी डुबेको भन्ने पनि थाहा छ । अनि देशलाई कसरी उतार्ने भन्ने पनि थाहा छ तर ती विद्वानहरु गर्छन् के भने यसैगरी पत्रपत्रिकामा आफ्ना ज्ञानका भण्डार ओकल्छन् र फेसबुक र ट्वीटरमा पण्डित्याईं गर्छन् । अनि देश उस्ताको उस्तै ।
म भन्न चाहन्छु, तपाईहरु जस्तो ज्ञान भएका विद्वानहरु राजनीतिमा आइदिनु भएको भए यो देश उहिल्यै बनिसक्थ्यो । र करिष्मा मानन्धर जस्तो अल्पज्ञानीहरुले देश बनाउँछु भनेर अघि सर्नुपर्दैन थियो । यो मेरो लागि सौभाग्य भए पनि यो देशको लागि दुर्भाग्य हो ।
पर्खिरहनु होस्, लामा लामा आर्टिकल लेख्दै गर्नोस् । गालीगलौजले सामाजिक सञ्जालका भित्ता रंग्याउँदै गर्नोस् । कुनै दिन जनताको मन र मत जितेर यो देशको विकासमा ठूलो योगदान दिनेछु । त्यो दिन धेरै टाढा छैन र त्यो दिन के भनेर उडाउने के भनेर आलोचना गर्ने, तयारी आजैबाट सुरु गर्नुहोला । मेरो जीवन कालमा धेरै डिग्री भएका मानिस भेटेको छु । यस्तो मानिसको न देशमा कमी छ न विदेशमा । कसै कसैसँग त ट्रिपल डिग्री पनि छ तर माफ गर्नुहोला, त्यसको फाइदाको शब्द यो समाजले चाख्न पाएन ।
मसँग तपाईहरुसँग भएको डिग्री त छैन होला तर तपाईहरुँसग म सित भएको देशको फिक्री छैन …
0 comments
Write Down Your Responses