डेराबस्ने महिला बलात्कार गर्ने घरबेटी पक्राउ
राजविराजः घरमा डेरा गरी बस्ने महिलालाई बलात्कार गरी बेचबिखन लागि ओसारपसार गरेको आरोपमा प्रहरीले यशवन्त सिंहलाई प्रकाउ गरेको छ ।
प्रहरीले सप्तरीको कोइलाडी घर भई राजविराज ४ स्थित सप्तरी सेवा आश्रममा बस्ने ५० वर्षीय यशवन्त सिंहलाई सप्तरी प्रहरीले शनिबार पक्राउ गरेको हो ।
लुकिछिपी बसिरहेका आरोपितलाई जिल्ला प्रहरी कार्यालय सप्तरीबाट गएको टोलीले आश्रमस्थित निजको घरबाट शनिबार पक्राउ गरेको प्रहरी नायब उपरीक्षक दानबहादुर कार्कीले जानकारी दिए ।
आरोपित सिंह सद्भावना पार्टीका संस्थापक अध्यक्ष गजेन्द्रनारायण सिंहका भतिजा एवं ०६५÷०६६ सालमा सरीता गिरी नेतृत्वको नेपाल सद्भावना पार्टीका महासचिव हुन् ।
दुई नाबालक छोरा र श्रीमानसहित पीडित आरोपित सिंहको घरमा डेरा गरी बसेकी थिइन् । पीडित र उनका श्रीमानबीचको मनमुटाव र आपसी विवादको फाइदा उठाएर आरोपितले भारत लगेर यौन शोषण गरेको आरोप छ ।
पीडितका अनुसार आरोपितले जिल्ला अदालतमा ०७१ फागुन ४ गते पतिविरुद्ध सम्बन्ध विच्छेद तथा प्रहरी, प्रशासनमा शान्ति सुरक्षाको माग गर्दै निवेदन दर्ता गराउन दुरुत्साहन गरेका थिए ।
सिंहको घरमा आइरहने फकिरा घर भई राजविराज ८ बस्ने ४८ वर्षीय श्रीराम यादवको जिम्मा लगाई सिंहले पीडितलाई पतिविरुद्ध मुद्दा दर्ता गराउन लगाएको र ०७१ फागुन ६ गतेसम्म राजविराजस्थित अदालत पछाडिको घरमा लुकाएर राखेको पीडितले बताइन् ।
श्रीरामले ०७१ फागुन ७ गते विहान सिरहाको माडरबाट जयनगर हुँदै भारतको दरभंगा पुर्याई सिंहको जिम्मा लगाएको पीडितको आरोप छ । श्रीरामलाई दरभंगाबाट राजविराज फर्काउँदै पीडितलाई पटना पुर्याएका सिंहले १० दिनसम्म ललाई फकाई राखेको र ०७१ फागुन १८ गते राति बलात्कार गरेको महिलाले आरोप लगाइन् ।
यौन शोषण गरेका आरोपितले वेश्यालयमा बिक्री गर्न खोजेको चाल पाएपछि ०७१ फागुन २२ गते राति सुतेको मौका पारी भागेर ०७१ फागुन २४ गते नेपाल आइपुगेको पीडितले बताइन् ।
जिल्ला प्रहरी कार्यालय र जिल्ला प्रशासन कार्यालयमा ०७१ फागुन २५ र २६ गते दिएको उजुरी दर्ता नभएपछि पीडितले ०७१ फागुन २८ गते परमादेशका लागि निवेदन दिएकी थिइन् । पुनरावेदन अदालत राजविराजले अविलम्व अनुन्धान, छानबिन गर्नु गराउनु भनी ०७२ जेठ ३१ गते परमादेश दिएको थियो ।
परमादेश भएको नौ महिनापछि जिल्ला प्रहरी कार्यालयले ०७२ फागुन २१ गते सिंह र यादवविरुद्ध मानवबेचविखन ओसारपसार तथा जबरजस्ती करणी मुद्दा दर्ता गरेको थियो । पक्राउ परेका सिंहले आरोप निराधार र झुठा भएको बताएका छन् ।
0 comments
Write Down Your Responses