कास्की, जेठ ९ – आफू शेष घलेको छोरा भएको भन्दै विभिन्न व्यक्तिलाई ठगी गर्ने एक जनालाई प्रहरीले कास्कीबाट पक्राउ गरेको छ । तनहूँको मनपाङ–२ शेराटार स्थायी घर भई चितवनको पार्वतीपुर बस्ने २७ वर्षका राज भन्ने चित्रकुमार श्रेष्ठलाई वडा प्रहरी कार्यालय बैदाम पोखराले पक्रेको हो । श्रेष्ठले आफू शेष घलेको छोरा आकाश घले भएको र अहिले अमेरिकामा बस्दै आएको भन्दै आकाश घलेकै नामको फेसबुक तथा भाइवरबाट केटी साथी बनाउने र अमेरिका आउन चाहे नेपालमा रहेका आफ्नो साथीलाई भेट्न भन्ने गरेका थिए । भेट्न चाहनेलाई आफै आकाश घलेको साथी बनेर भेट्ने र केटीलाई अमेरिका पठाइ दिने आश्वासन दिँदै ठगी गर्ने गरेको पाइएको कास्की प्रहरीले जनाएको छ । 

उनले फेसबुक तथा भाइबरबाट केटी साथी बनाई विभिन्न बहानामा ठगी गर्ने गरेको स्वीकार गरेको प्रहरीले जनाएको छ । उनले प्रारम्भिक सोधपुछको क्रममा आफू गएको १० वर्षदेखि मलेसियामा अवैध कामदारका रुपमा रही गएको वैशाख २५ गते मात्रै नेपाल फर्किएको बताएको कास्कीका प्रहरी प्रमुख एसपी घनश्याम अर्यालले जानकारी दिनुभयो । यस बारेमा थप अनुसन्धान भइरहेको बताउँदै एसपी अर्यालले यस्तै प्रकृतिको घटना कसैसँग घटेको भए वडा प्रहरी कार्यालय बैदाम वा जिल्ला प्रहरी कार्यालय कास्कीमा सम्पर्क गर्न अनुरोध समेत गर्नुभएको छ ।